मणिपूर चक्र नाभी/बेंबीवर असते. याचा रंग नारिंगी पिवळा आहे. हे चक्र अग्नितत्त्वाचे कारक आहे. उष्णता हा याचा सूक्ष्म गुणधर्म असून, रूप वा दृष्टी हा याचा मूळ गुण आहे. या चक्रामुळे शरीरातील पचनसंस्था कार्यरत राहते.

आपल्या शरीरातील क्षुधा, तृष्णा, आळस, निद्रा, मैथुन हे अग्नितत्त्वाच्या अधीन आहेत. अन्नाचे पचन, शोषण, रसोत्पादन, मल उत्सर्जन तसेच प्रजोत्पादन, श्वासोच्छ्वास, रुधिराभिसरण ही महत्त्वाची कार्ये मणिपूर चक्राच्या आधिपत्याखाली येतात. खाल्लेल्या अन्नाचे रूपांतर आवश्यक ऊर्जेत करण्याचे कार्य मणिपूर चक्र करते. मणिपूर चक्र हे जाणिवांचे केंद्र आहे. परिस्थितीनुरूप वर्तन हा याचा गुण आहे. ज्याचे मणिपूर चक्र सक्षम असते ती व्यक्ती कर्तृत्ववान असते.