आपला स्वतःचा उद्धार करीत असताना समाजभान असायला हवे ही भारतीय परंपरेची शिकवण आहे. समाजात असे अनेक घटक आहेत ज्यांना भावनिकदृष्ट्या मदतीचा हात व प्रेमाचा शब्द हवा असतो. निरामय परिवाराने मागील वर्षीप्रमाणे यंदाही आगळ्या-वेगळ्या पद्धतीने दिवाळी साजरी केली. जनसेवा फाउंडेशनतर्फे चालविल्या जाणाऱ्या पुनर्वसन केंद्रातील कौटुंबिक प्रेमापासून वंचित अशा मुलांसोबत ही दिवाळी पुण्यात साजरी करण्यात आली.

या चैतन्यमयी सोहळ्यात उपस्थित लहानग्यांचे निरामयच्या सर्व कर्मचाऱ्यांतर्फे अगत्याने स्वागत करण्यात आले. तदनंतर या सर्व मुलांचे आस्थेने औक्षण करण्यात आले. सकारात्मक वैश्विक स्पंदनांना आकर्षित करणाऱ्या या पारंपरिक उपचारानंतर करमणूक व ज्ञानाचा सुंदर मिलाफ असलेला कठपुतल्यांचा कार्यक्रम या बालचमूसाठी सादर करण्यात आला! त्यापुढील वेळ मनमोकळ्या गप्पागोष्टी व स्नेहभोजनात कसा गेला हे उपस्थितांना कळलेच नाही. जाण्यापूर्वी सर्व बालगोपाळांना नवीन कपडे व फराळ सोबत देण्यात आला. या निष्पाप मुलांच्या जीवनात एक आशेचा दीप व आनंदाचा झरा निर्माण करण्याचा हा निरामयचा छोटासा प्रयत्न होता.