अनाहत चक्र छातीच्या मध्यभागी म्हणजेच हृदयाजवळ असते. याचा रंग हिरवा आहे. हे चक्र वायू तत्त्वाचे कारक आहे. गतिशीलता हा याचा सूक्ष्म गुणधर्म असून, स्पर्श हा याचा मूळ गुण आहे. हृदय व फुप्फुस या छातीतील अत्यंत महत्त्वाच्या अवयवांवर या चक्राचे नियंत्रण असते. आपल्या शरीरातील चलन-वलन, आकुंचन, प्रसरण व निरोधन हे वायू तत्त्वाच्या अधीन आहेत. श्वासोच्छ्वास व रक्ताभिसरण ही महत्त्वाची कार्ये अनाहत चक्राच्या आधिपत्याखाली येतात. थायमस ग्रंथीवरही या चक्राचा ताबा असतो. अनाहत चक्र हे भाव-भावनांचे केंद्र आहे. याला शक्तिकेंद्रही संबोधले जाते. ज्याचे अनाहत चक्र सक्षम असते, ती व्यक्ती स्वार्थ व परमार्थाचा समतोल राखू शकते.